Gal 3 | NdeIBE | STEP | Lina maGalathiya ayizithutha! Ngubani oliloyileyo? Phambi kwawo amehlo enu uJesu Khristu wabonakaliswa obala ebethelwe.

Galatians 3

Ukukholwa Kumbe Ukugcinwa Komthetho

1 Lina maGalathiya ayizithutha! Ngubani oliloyileyo? Phambi kwawo amehlo enu uJesu Khristu wabonakaliswa obala ebethelwe.

2 Mina ngifuna ukwazi into eyodwa nje kini: UMoya lamamukela ngokugcina umthetho, loba ngokukholwa lokho elakuzwayo na? 3 Kanti liyizithutha kangaka na? Emva kokuqalisa ngoMoya, khathesi selizama ukuzuza ukuphelela ngemizamo yabantu na? 4 Kanti lihlupheke kangaka lihluphekela ize na – uma impela kwakungokweze?

5 Kanti uNkulunkulu ulinika uMoya wakhe asebenze izimangaliso phakathi kwenu ngoba ligcina umthetho, loba ngoba likholwa lokho elakuzwayo na?

6 Khumbulani u-Abhrahama: “Wakholwa kuNkulunkulu, kwabalelwa kuye njengokulunga.” 7 Ngakho zwisisani ukuthi labo abakholwayo bangabantwana baka-Abhrahama. 8 Umbhalo wabona ngaphambili ukuthi uNkulunkulu wayezalungisa abezizweni ngokukholwa, wasehle ememezela ivangeli ngaphambili ku-Abhrahama esithi: “Izizwe zonke zizabusiswa ngawe.” 9 Ngakho labo abalokholo babusiswa kanye lo-Abhrahama, umuntu wokholo.

10 Bonke abathembe umthetho bangaphansi kwesiqalekiso, ngoba kulotshiwe ukuthi: “Uthukiwe umuntu wonke ongaqhubeki esenza konke okulotshwe encwadini yoMthetho.”

11 Ngokusobala kakho umuntu olungisiswa ngomthetho phambi kukaNkulunkulu, ngoba, “Abalungileyo bazaphila ngokukholwa.”

12 Umthetho kaweyamanga ekukholweni; kodwa, “Umuntu owenze izinto lezi uzaphila ngazo.” 13 UKhristu wasihlenga esiqalekisweni somthetho ngokuba yisiqalekiso ngenxa yethu, ngoba kulotshiwe ukuthi: “Uqalekisiwe umuntu wonke olengiswa esihlahleni.” 14 Wasihlenga ukuze isibusiso esaphiwa u-Abhrahama sifike kwabezizweni ngoKhristu uJesu, ukuze samukele isithembiso sikaMoya ngokukholwa.

Umthetho Lesithembiso

15 Bazalwane, ake ngithathe isibonelo sokuphila kwansuku zonke. Njengoba engekho ongabeka eceleni loba engeze kusivumelwano sabantu esenziwe ngemfanelo, kunjalo-ke lakule indaba. 16 Izithembiso zatshiwo ku-Abhrahama lakunzalo yakhe. Umbhalo kawuthi “kwabenzalo,” usitsho abantu abanengi, kodwa uthi, “lakunzalo yakhe,” usitsho umuntu oyedwa, lowo kunguKhristu. 17 Engikutshoyo yilokhu: Umthetho, owabekwa eminyakeni engamakhulu amane lamatshumi amathathu muva, kawusibeki eceleni isivumelwano esamiswa ngaphambili nguNkulunkulu ngalokho wesule isithembiso. 18 Ngoba uma ilifa leyame emthethweni, ngalokho kaliseyamanga kusithembiso; kodwa uNkulunkulu ngomusa wakhe, walinika u-Abhrahama ngesithembiso.

19 Pho, yayiyini-ke injongo yomthetho? Wengezelelwa ngenxa yeziphambeko kwaze kwafika iNzalo eyayitshiwo yisithembiso. Umthetho wenziwa wasebenza ngezingilosi langommeli. 20 Kodwa ummeli kameli icele elilodwa; kodwa munye uNkulunkulu.

21 Kambe, ngalokho, umthetho uphambene lezithembiso zikaNkulunkulu na? Akunjalo lakancane! Ngoba uma kwakubekwe umthetho onika ukuphila, ukulunga impela kwakuzavela ngomthetho. 22 Kodwa umbhalo uyatsho ukuthi umhlaba wonke uyisigqili sesono, ukwenza ukuthi okwakuthenjisiwe, kunikwa ngokukholwa kuJesu Khristu, kunikwe labo abakholwayo.

23 Ukholo lolu lungakabi khona, sasiyizibotshwa zomthetho, sivalelwe ukholo luze lubonakaliswe. 24 Ngakho umthetho waphiwa amandla okusiholela kuKhristu ukuba silungisiswe ngokukholwa. 25 Khathesi-ke njengoba ukukholwa sekukhona, kasisekho ngaphansi kwamandla omthetho.

Amadodana KaNkulunkulu

26 Lonke lingamadodana kaNkulunkulu ngokukholwa kuKhristu uJesu, 27 ngoba lonke lina elabhaphathizelwa kuKhristu selizembathise ngoKhristu. 28 AkulamJuda loba umGiriki, isigqili loba okhululekileyo, owesilisa loba owesifazana, ngoba lonke limunye kuKhristu uJesu. 29 Uma lingabakaKhristu, ngalokho liyinzalo ka-Abhrahama, lezindlalifa mayelana lesithembiso.